Cebu City – Dul-an sa 200 ka Bol-anong mag-uuma, mamumuo sa umahan ug mangingisda ubos sa mga progresibong pundok sa HUMABOL-KMP (Hugpong sa Mag-uumang Bol-anon-Kilusang Magbubukid ng Pilipinas), BAYAN (Bagong Alyansang Makabayan), Gabriela, Sabakan (Sandigan sa Bol-anong Kababayen-ang Nag-uma ug Nanagat)-Amihan ug ubang kaalyadong grupo, ang mipadangat sa ilang mga suliran, reklamo ug demanda atol ning buwan sa Mag-uuma, ngadto sa mga rehiyunal nga ahensya sa gobyerno nga nahimutang ning syudad.

Ang pag-anhi sa mga Bol-anon kabahin sa kalihukang gitawag og “Lakbayan ng Visayas: Pagbatok sa Kagutom ug Pagpamig-ot sa Estado” nga gipahigayon gikan petsa 17-20 dinhi sa dakbayan. Ang maong kalihukan nga gisalmotan sa liboan ka kabus nga katawhan gikan sa nagkadaiyang isla sa Kabisay-an lakip na ang Negros, Samar ug Leyte, nagtinguha nga madunggan ug mahatagan og hinanaling pagtagad sa gobyerno ang ilang mga suliran ug demanda pinaagi sa pagpalanog niini sa Cebu City nga maoy ikaduhang sentrong urban sa nasud. Nagtumong sab kini nga makuha ang suporta sa labing lapad nga katawhan alang sa ilang “lehitimong pakigbisog”.

Pinaagi sa Visayas Rural Poor Summit nga gipahigayon sa ika-duhang adlaw sa Lakbayan, gihisgutan ug gitapok sa mga delegado ang ilang mga demanda. Matud ni Racquel Autida sa Gabriela Bohol, “Nanguna namong demanda mao ang pagpatuman sa tinuod nga reporma sa yuta lakip na ang paghatag og suportang serbisyo sa panguma sama sa libreng irigasyon. Amo sab nga giduso ang pagpabarog og kaugalingong mga industriya sa Pilipinas aron makamugna’g lahutay’ng mga trabaho ug di na magsalig sa pagpangangkat og human-daang produkto gikan sa langyaw’ng nasud. Niining pamaagiha, wala na unyay mga inahan ug ubang kababayen-an nga mapugos pagpanarbaho kasagaran isip katabang didto sa ubang nasud ug mag-antos sa abuso sa ilang mga amo”.

Atol sa summit, mipasabot si Atty. Neri Colmenares sa Bayan Muna labot sa giduso nga bag-ong pamuhis sa administrasyong Duterte nga mao ang Tax Reform Acceleration with Inclusions (TRAIN) diin matud niya mupataas sa presyo sa mga batakang palaliton ug busa mayoriyang kabus ang nangunang maapektuhan.

Pinaagi sa pagsaka sa nagkadaiyang ahensya sa gobyerno, giduso sa mga Lakbayani ang ilang mga hinanaling demanda. Lakip sa opisinang gisaka sa mga Lakbayani’ng Bol-anon alang sa dayalogo mao ang DAR (Department of Agrarian Reform), DENR (Department of Environment and Natural Resources), NIA (National Irrigation Administration) ug DOLE (Department of Labor and Employment).

Samtang didto sa Plaza Independencia nga maoy gihimong temporaryong pondohanan sa mga Lakbayani, mibisita, nakighinabi ug nakighiusa usab kanila ang mga estudyante gikan sa University of the Philippines (UP), Abellana National Highschool ug uban pang tulunghaan, aron hibaloon gikan mismo sa mga mag-uuma ug mangingisda ang kalisud sa panginabuhi bunga sa matud pa, di makiangayong mga palisiya ug programa sa gobyerno sama sa gitawag nilang ” peke nga CARP (Comprehensive Agrarian Reform Program)” ug “kontra-mananagat” nga balaod sa panagat nga mao ang RA 8550 ug RA 10654.

Gitapos sa mga Lakbayani ang ilang panaw kun Lakbayan kagahapon, pinaagi sa paglunsad og rali-protesta gikan sa AFP (Armed Forces of the Philippines) Central Command, ngadto na sa Police Regional Office 7 (PRO7), aron kondenahon ang nagkadaghang mga kaso sa paglapas sa tawhanong katungod lakip na ang pagpamatay sa mga sakop sa progesibong pundok ubos sa “kontra-insurhensyang programang Oplan Kapayapaan sa rehimeng US-Duterte diin militar ug pulis ang gitumbok nga mga sad-an” sumala ni Danilo Olayvar, Chairperson sa HUMABOL.

Gikan sa PRO7, gidala sa mga Lakbayani ang ilang rali-protesta didto sa dalan Colon nga maoy nagtak-op sa upat ka adlaw’ng kalihukan.#